У кастрычніку адзначаюць свята мамы, таму ў парафіі св. Яна Хрысціцеля ў Мінску 17 кастрычніка прайшоў канцэрт у гонар мамы! Распачаўся ён святой Імшой а 19 гадзіне.

Пасля Імшы распачаўся канцэрт, на якім прысутнічала шмат мам са сваімі дзецьмі. У канцэрце прымалі ўдзел не толькі дзеці, але таксама і мамы.  

 

Распачаўся канцэрт маленькім прыгожым вершам для мамы, які распавёў наймалодшы ўдзельнік канцэрту! За ім сваю любоў да матуль праз спеў выказвалі дзеці, прадстаўнікі дзіцячага парафіяльнага хору і парафіяне. Асабліва кранаючым былі нумары, прысвечаныя матулям, якія ўжо знаходзяцца ў небе. Таксама яскравым момантам праграмы сталі нумары, у якіх мамы і іх дачкі спявалі разам. 

 

Дакладна, што ў духу св. Яна Боско, праз спевы, вершы і музычныя нумары арганізатары канцэрту паспрабавалі звярнуць нашу ўвагу на роль маці ў жыцці чалавека і неабходнасці цаніць гэты дар і адпаведна рыхтавацца да яго.

 

Напрыканцы канцэрту пробашч парафіі кс. Аляксандр Мятліцкі SDB прыпомніў, што часам варта размаўляць са сваёй матуляй, дзякаваць ёй за яе апеку, любоў і за тое, што яна проста ёсць, бо яна ў нас адна. Дарэчы, ад пробашча таксама прагучала прыгожая песня.

 

Дар'я Купцова