Сёння, 27 верасня, пад час св. Імшы Сумы наша парафія вітала новага святара, якому з гэтага часу належыць нясці сваю паслугу ў Серабранцы. Кс. Павел Шчарбіцкі SDB перадаў усе свае паўнамоцтвы выконваючага абавязкі дырэктара мінскай супольнасці салезіянаў кс. Івану Огару SDB. З гэтага моманту асноўным заданнем кс. Івана, згодна з Канстытуцыяй салезіянаў, стане натхненне “супольнасці, каб яна жыла ў вернасці Канстытуцыі і ўзрастала ў адзінстве”.
Адпаведнае рашэнне аб перамене прыняў дэлегат салезіянаў у Беларусі кс. Віктар Гайдукевіч SDB, якое выказаў праз афіцыйны ліст, накіраваны да салезіянскай сям’і нашай краіны.
Напрыканцы супольнай малітвы салезіянская сям’я, якая служыць Богу і людзям у нашай парафіі і прысутнічаючыя вернікі сардэчна прывіталі кс. Івана, абяцаючы яму сваю падтрымку і выказваючы надзею на сумесную плённую працу дзеля збаўлення душаў.
Згодна з рашэннем дэлегата, кс. Павел Шчарбіцкі SDB будзе несці сваю дальнейшую паслугу ў смаргонскай парафіі св. Міхала Арханёла. Імша падзякі святару за плённае служэнне ў нашай парафіі адбудзецца ў сераду, 30 верасня, а 19.00.
Таццяна Ісакава